அமெரிக்காவின் புளோரிடா மாகாணத்தில் உள்ள மியாமி சர்வதேச விமான நிலையத்தில், சரக்கு விமானமும் பயணிகள் விமானமும் எதிர்பாராதவிதமாக ஒன்றையொன்று மோதிக்கொண்ட விபத்து நிகழ்ந்துள்ளது. பனாமா நகரத்திலிருந்து வந்த கோபா ஏர்லைன்ஸ் (Copa Airlines) பயணிகள் விமானமும், கொலொம்பியா நோக்கிச் செல்லத் தயாரான யூ.பி.எஸ் (UPS) சரக்கு விமானமும் சந்திப்புப் பாதையில் சென்றபோது இந்த விபத்து ஏற்பட்டுள்ளது.
விபத்து நிகழ்ந்தபோது கோபா ஏர்லைன்ஸ் விமானத்தில் பயணிகள் மற்றும் பணியாளர்கள் எனப் பலரும் இருந்த நிலையில், விமானத்தின் முன்பகுதி பலத்த சேதமடைந்தது. இந்தச் சம்பவத்தைத் தொடர்ந்து விமான நிலையத்தின் கட்டுப்பாட்டு அறையுடன் விமான ஓட்டிகள் உரையாடிய ஆடியோ பதிவுகள் மற்றும் விபத்துக்குள்ளான விமானத்தின் புகைப்படங்கள் இணையத்தில் வெளியாகிப் பரவி வருகின்றன.
இந்த விபத்தில் இருவர் லேசான காயங்களுடன் தப்பியதாகவும், அவர்களுக்கு விமான நிலையத்திலேயே மருத்துவச் சிகிச்சை அளிக்கப்பட்டதாகவும் அவசரப் பிரிவு அதிகாரிகள் தெரிவித்துள்ளனர். அமெரிக்காவில் முந்தைய நாள் ஏற்பட்ட விமானப் போக்குவரத்துச் சிக்கல்களுக்குப் பிறகு இந்த விபத்து நிகழ்ந்துள்ளது பயணிகளிடையே அதிர்ச்சியை ஏற்படுத்தியுள்ளது.
விபத்துக்கான காரணம் குறித்து அமெரிக்க ஃபெடரல் விமானப் போக்குவரத்து நிர்வாகம் (FAA) மற்றும் விமான நிலைய அதிகாரிகள் தீவிர விசாரணையைத் தொடங்கியுள்ளனர். இந்த விபத்தினால் விமான நிலையத்தின் பிற சேவைகளுக்குப் பெரிய அளவில் பாதிப்பு ஏற்படவில்லை என்றும், மாற்றுப் பாதைகள் மூலம் விமானங்கள் இயக்கப்பட்டு வருவதாகவும் நிர்வாகம் தரப்பில் விளக்கமளிக்கப்பட்டுள்ளது.
