ரஷ்ய அதிபர் விளாடிமிர் புதினைத் தனது ஓவியங்கள் மற்றும் கார்ட்டூன்கள் மூலம் மிகக் கடுமையாக விமரிசித்து வந்த பிரபல ரஷ்ய கலைஞர் செம்யோன் ஸ்க்ரபெட்ஸ்கி (44) (உண்மைப் பெயர்: ராபர்ட் குசோவ்கோவ்), போலந்து நாட்டில் அடையாளம் தெரியாத நபரால் சுட்டுக்கொலை செய்யப்பட்டுள்ளார். பெலாரஸ் நாட்டின் எல்லைக்கு அருகில் உள்ள பியாலா போட்லாஸ்கா (Biała Podlaska) என்ற கிழக்கு போலந்து நகரில் உள்ள அடுக்குமாடி குடியிருப்பு வாகன நிறுத்துமிடத்தில் வைத்து இக்கொடூரச் சம்பவம் அரங்கேறியுள்ளது. திட்டமிட்டு நடத்தப்பட்ட இந்த படுகொலைச் சம்பவம் சர்வதேச அரசியல் மற்றும் கலை உலகினரிடையே மிகப்பெரிய அதிர்ச்சியை ஏற்படுத்தியுள்ளது.
போலந்து நாட்டு மாவட்ட அரசு வழக்கறிஞர் அலுவலகத்தின் செய்தித் தொடர்பாளர் மார்சின் கோசக் வெளியிட்டுள்ள அதிகாரப்பூர்வ தகவலின்படி, திங்கட்கிழமை அதிகாலையில் இந்தத் தாக்குதல் நடந்துள்ளது. அடையாளம் தெரியாத நபர் ஒருவர் ஸ்க்ரபெட்ஸ்கியை நெருங்கித் துப்பாக்கியால் இரண்டு முறை சுட்டுள்ளார். அவர் நிலத்தில் சுருண்டு விழுந்த பிறகும், கொலையாளி மிக அருகில் சென்று அவரது தலை மற்றும் நெஞ்சுப் பகுதியில் மேலும் மூன்று முறை சுட்டுவிட்டு அங்கிருந்து தப்பியோடியுள்ளார். மொத்தம் ஐந்து குண்டுகள் பாய்ந்த நிலையில், சம்பவ இடத்திலேயே அவர் துடிதுடித்து உயிரிழந்துள்ளார்.
விளாடிமிர் புதின், பெலாரஸ் அதிபர் லுகாஷென்கோ மற்றும் செச்சென் தலைவர் ரம்ஜான் காடிரோவ் ஆகியோரை நையாண்டி செய்யும் வகையில் பல்வேறு நையாண்டிப் படங்களையும் சர்ச்சை ஓவியங்களையும் ஸ்க்ரபெட்ஸ்கி வரைந்து வந்தார். கடந்த 2021-ஆம் ஆண்டு ரஷ்யாவில் அரசியல் பழிவாங்கலுக்கு அஞ்சி போலந்திற்குத் தப்பி வந்த இவர், கொலை செய்யப்படுவதற்கு நான்கு நாட்களுக்கு முன்புதான் (ஜூன் 12 ரஷ்யா தினத்தன்று) ஜெர்மனி தலைநகர் பெர்லினில் உள்ள ரஷ்ய தூதரகத்தின் முன்னால் ஜோசப் ஸ்டாலின் குழந்தை வடிவிலான புதினைத் தூக்கி வைத்திருப்பது போன்ற வினோதமான ஓவியத்தை ஏந்திப் போராட்டம் நடத்தியிருந்தார். இந்தப் போராட்டத்திற்குப் பிறகு அவருக்குத் தொடர்ந்து கொலை மிரட்டல்கள் வந்ததாகத் தனது டெலிகிராம் பக்கத்தில் அவர் பதிவிட்டிருந்தார்.
இக்கொலைச் சம்பவம் தொடர்பாகப் போலந்து போலீஸார் அந்தப் பகுதியில் உள்ள பெலாரஸ் நாட்டுத் தூதரகத்தின் அருகே சந்தேகத்திற்கு இடமாக நடமாடிய 33 மற்றும் 37 வயதுடைய இரு பெலாரஸ் குடிமக்களை அதிரடியாகக் கைது செய்துள்ளனர். தப்பியோடிய முதன்மைக் கொலையாளியைப் பிடிக்கத் தனிப்படை அமைக்கப்பட்டுத் தீவிரத் தேடுதல் வேட்டை நடந்து வருகிறது. உக்ரைன் போருக்குப் பிறகு போலந்து நாடு ரஷ்ய ஒற்றர்களின் முக்கிய இலக்காக மாறியுள்ளதாகக் குற்றம் சாட்டப்பட்டு வரும் நிலையில், புதினின் தீவிர விமர்சகர் ஒருவர் ஐரோப்பிய மண்ணில் படுகொலை செய்யப்பட்டுள்ளது ரஷ்யாவின் உளவு அமைப்புகளின் சதிச் செயலா என்ற கோணத்தில் சைபர் மற்றும் சர்வதேசப் பாதுகாப்புப் பிரிவினர் விசாரணையை முடுக்கிவிட்டுள்ளனர்.
