விடுதலைப்புலிகள் சரணடைவற்கு இந்தியா கொடுத்த புரபோஷல்!-

08 Jun,2018
 

 

 

 
கிளிநொச்சி, புதுடில்லி, வொஷிங்டன் பின்னர் மலேசியா, ஒஸ்லோ என ஐந்து நகரங்களை மையமாக வைத்து நடந்த சிக்கலான இரகசிய பேச்சுக்கள் பற்றிய விபரங்களை இந்த பகுதியில் தரவிருக்கிறோம்.
இதற்கு முன்னர் ஒரு பிளாஷ்பேக்கிற்கு உங்களை அழைத்து செல்கிறோம்.
2009 ஜூன் மாதம். சென்னையில் நடந்த நிகழ்ச்சியொன்றில் பேசிய அப்போதைய இந்திய நிதியமைச்சர் ப.சிதம்பரம் பேசும்போது இப்படி பேசினார். ‘இலங்கையில் நடந்த உள்நாட்டுப் போரை நிறுத்துவதற்கு பல முயற்சிகள் நடந்தன. இந்திய அரசும் நிறைய முயற்சிகள் மேற்கொண்டது. ஆனால், இலங்கை அரசும் புலிகள் தரப்பிலும் அதற்கு செவிசாய்க்கவில்லை. மத்திய அரசு சொன்னபடி நடந்திருந்தால், புலிகள் அமைப்பு அழியாமலிருந்திருக்கும். பிரபாகரனும் உயிர் தப்பியிருக்க வாய்ப்பு உண்டு. இறுதியுத்தத்தில் ஏற்பட்ட உயிரிழப்புக்களையும் தடுத்திருக்கலாம்’. என்றார்.
ப.சிதம்பரம் சொன்ன நிறைய முயற்சிகள் எவை?
 ப.சிதம்பரம்
இந்த சமயத்தில் காங்கிரசின் தமிழ்நாட்டு முக்கியஸ்தர் ஈ.வி.கே.எஸ்.இளங்கோவன் உள்ளிட்ட பலர், வைகோ மற்றும் நெடுமாறன் மீது கடுமையான குற்றச்சாட்டுக்கள் சுமத்தினார்கள். ‘இந்தியா மேற்கொண்ட சமரச முயற்சிகளை வை.கோ, நெடுமாறன் இருவரும் குழப்பிவிட்டனர். புலிகளிற்கு தவறான தகவல்களை கொடுத்து புலிகளை அழித்துவிட்டனர்’ என குற்றம்சாட்டினார்கள். அது உண்மையா?
எட்டு வருடங்களின் முன்னர் அந்த நாட்களில் நடந்த இரகசிய உள்சுற்று பேச்சுக்களிற்கு உங்களை அழைத்து செல்வதற்கு முன்னர், ஒரு விசயத்தை சொல்லிவிடுகிறோம். இந்த பேச்சுக்களில் கலந்துகொண்டது மிகச்சிலர்தான். புலிகள் தரப்பில் பிரபாகரன், நடேசன், பொட்டம்மான், கஸ்ரோ ஆகியோர் வன்னியிலிருந்து இதை கையாள, மலேசியா, அமெரிக்கா, நோர்வே ஆகிய நாடுகளில் உள்ள மூவரும் சம்பந்தப்பட்டிருந்தனர். அவர்கள் இப்பொழுதும் இருக்கிறார்கள். இந்தியாவில் மொத்தம் ஐவர் இதில் சம்பந்தப்பட்டவர்கள். அதில் தி.மு.க தலைவர் கருணாநிதியின் குடும்ப உறுப்பினரும், பாஜகவின் முடிவெடுக்கும் மட்டத்தில் உள்ள உயர் தலைவரும், ஒரு வடஇந்திய பத்திரிகையாளரும் அடக்கம்!
 
அமெரிக்க ஸ்ரேற்ஸ் டிப்பார்ட்மென்ற் ஆட்களையும், நோர்வே டிப்ளோமற்ஸையும் இந்த கணக்கில் சேர்க்கவில்லை.
பல திசைகளிலும் இருந்த இந்த புள்ளிகளிற்குள் எப்படி தொடர்பேற்பட்டது என்பதை குறிப்பிடுகிறோம்.
இந்த சமரச முயற்சிகள் எப்பொழுது தொடங்கியதென்றால்ஸ மிகச்சரியாக சொன்னால், 2008 செப்ரெம்பரில் நடந்தது. அப்பொழுதுதான் இடைத்தரகர் ஒருவர் மூலம் இந்திய மத்திய அமைச்சர் ப.சிதம்பரத்திற்கும் புலிகளிற்கும் தொடர்பு ஏற்பட்டது. யார் அந்த இடைத்தரகர் என்பதை பின்னர் குறிப்பிடுகிறோம். புலிகள் விட்டுக்கொடுப்பிற்கு தயாராகிறார்கள் என்ற விசயம் 2008 செப்ரெம்பரில் சிதம்பரத்திற்கு தெரிந்தது!
அதுவரை விட்டுக்கொடுப்புடனான சமரச முயற்சியொன்றிற்கும் புலிகள் தயாராக இருக்கவில்லை. தமது ராஜதந்திர தொடர்புகள் மூலம் யுத்தத்தை நிறுத்த முயற்சித்துக் கொண்டிருந்தார்களே தவிர, தமது தரப்பில் விட்டுக்கொடுப்பு எதற்கும் தயராக இருக்கவில்லை. செப்ரெம்பர் மாத முயற்சியும் கிட்டத்தட்ட அதேவகையானதுதான். யுத்தத்தை கொஞ்சம் தாமதித்தால், இரண்டு நாடுகளின் அழுத்தம் மூலம் யுத்தத்தை நிரந்தரமாக நிறுத்தலாம் என நினைத்தார்கள். அந்த நாடுகள் இந்தியா, அமெரிக்கா!
 
2008 இறுதியில்தான் அமெரிக்க அதிபர் தேர்தல் நடந்தது. 2009 ஜனவரியில்தான் புதிய அதிபர் பதவியேற்பார். புதிய அதிபராக பராக் ஒபாமா பதவியேற்பார் என பரவலாக எதிர்பார்க்கப்பட்டது. புலிகளின் அமெரிக்க நெற்வேர்க்கிலிருந்தும் இதேவிதமான ரிப்போர்ட்தான் வன்னிக்கு அனுப்பப்பட்டிருந்தது. இதனால்தான் ஒபாமாவிற்கான தமிழர் அமைப்பு என்ற ஒரு அமைப்பும் உருவாக்கப்பட்டிருந்தது. சில சட்டச்சிக்கல்கள் காரணமாக இப்போது மேலோட்டமாக மட்டும் ஒரு விசயத்தை சொல்கிறோம். ஒபாமாவின் தேர்தல் பிரசாரத்திற்காக விடுதலைப்புலிகளின் வெளிநாட்டு நெற்வேர்க்கிலிருந்தும் ஒரு தொகை பணம் சென்றது!
அதேபோல இந்திய பொது தேர்தலையும் புலிகள் எதிர்பார்த்திருந்தனர். இந்தியாவில் புலிகள் வேட்டையாடப்பட்டதால், ஐரோப்பிய நாடுகளை போல தமது உறுப்பினர்களை கொண்ட நெற்வேர்க் கிடையாது. ஆதரவாளர்களின் மூலமே விசயங்களை முடித்துக் கொண்டார்கள். இந்த ஆதரவாளர்கள் அரசியல்வாதிகள் என்றால், அவர்கள் மூலமே அரசியல் காய்நகர்த்தல்களையும் செய்தார்கள். 2009 ஏப்ரலில் இந்திய பொதுதேர்தல் நடக்கவிருந்தது. இதில் பாஜக கூட்டணி வெற்றியடையுமென பரவலாக எதிர்பார்க்கப்பட்டது. தமிழகத்தில் உள்ள புலிகளிற்கு ஆதரவான அரசியல் தலைவர்களும் இதேவிதமான கருத்தைதான் சொன்னார்கள். அவர்களின் அபிப்பிராயத்தை புலிகள் பெரிய விசயமாக எடுக்கவில்லை. பாஜக ஆட்சிக்கு வருமென புலிகள் தீவிரமாக நம்பியதற்கு இரண்டு காரணம்தான் உண்டு. முதலாவது, ஊடக கணிப்புக்கள் அப்படித்தான் சொல்லியது. இரண்டாவது, வட இந்திய பத்திரிகையாளர் ஒருவர். இந்தியாவிலிருந்து வெளியாகும் ஆங்கில பத்திரிகையொன்றின் ஆசிரியர்பீடத்தின் உயர்பொறுப்பில் இருந்தார். ஜவகர்லால் நேரு பல்கலைகழகத்தில் இதழியல்துறையில் வருகைதரு விரிவுரையாளராகவும் இருந்தார்.
 
இலங்கையின் மூத்த சட்டவாதியொருவர் இப்பொழுது அவுஸ்திரேலியாவில் உள்ளார். அவர் மூலம் புலிகளின் அனைத்துலக தொடர்பாளர் கஸ்ரோவுடன் அவருக்கு தொடர்பேற்பட்டது. கஸ்ரோ ஆங்கிலத்தில் சரளமாக உரையாட மாட்டார். இது தொடர்பு சிக்கலை ஏற்படுத்தியது. வடஇந்தியர் சாதாரண ஆள் கிடையாது, அரசு உயர்மட்டங்களுடன் தொடர்பை வைத்துள்ள ஆள் என்பதை தெரிந்ததும் புலிகளின் அமெரிக்க நெற்வேர்க்கில் இருந்த ஒரு சட்ட புலமையுள்ளவருடன் தொடர்பை ஏற்படுத்திக் கொடுத்தார்.
 புலிகளின் சர்வதேச விவகார பொறுப்பாளரான கஸ்ரோ
பாஜக அரசின் மூத்த தலைவர் ஒருவருடன் 2008 ஒக்ரோபரில் அந்த வடஇந்திய பத்திரிகையாளர் பேசினார். புலிகளின் வாக்குறுதி, எதிர்பார்ப்புடன் அவர் சென்றிருந்தார். பாஜக ஆட்சிக்கு வந்தால் இந்தியாவின் நலன்களிற்கு இடையூறாக இருக்கமாட்டோம் என்ற புலிகளின் வாக்குறுதியை பத்திரிகையாளர் வழங்கினார். அதேபோல, பாஜக ஆட்சிக்கு வந்ததும் யுத்தத்தை உடனடியாக நிறுத்த வைக்க வேண்டுமென்றும் கேட்டார். அந்த தலைவர் சிவசேனையில் தீவிர ஈடுபாடுடையவர். அவரை கவிழ்ப்பதற்கு வட இந்திய பத்திரிகையாளர் ஒரு உத்தியை கையாண்டார். வடக்கு கிழக்கில் இராணுவத்தால் அழிக்கப்பட்ட இந்து ஆலயங்கள் பற்றிய ஆவணத் தொகுப்பொன்றையும் தயாரித்து தர வேண்டுமென வன்னிக்கு சொல்லி, அதை எடுத்து வைத்திருந்தார். அந்த ஆவண தொகுப்பையும் பாஜக தலைவரிடம் கொடுத்தார். அந்த சந்திப்பில் பாஜக தரப்பிலிருந்து சொல்லும்படியான ரெஸ்பொன்ஸ் வரவில்லை.
ஆனால், ஒரு வாரத்தில் அந்த பத்திரிகையாளரை மீண்டும் சந்திக்க அழைத்த பாஜக தலைவர், புலிகள் கேட்ட வாக்குறுதியை கொடுத்தார். அதாவது, 2009 ஏப்ரலில் இந்திய பொது தேர்தலில் பாஜக வெற்றியடைந்திருந்தால், இலங்கையில் யுத்தத்தை நிறுத்த முழு அழுத்தம் கொடுத்திருக்கும்.
2008 நவம்பர் மாவீரர் தினத்திற்கு முன்னர், விசுவடுவில் பிரபாகரன் அனைத்து தளபதிகள், இளநிலை தளபதிகளை அழைத்து சந்திப்பொன்றை செய்தார். அதில் அவர் சொன்னது- ‘இந்த யுத்தத்தை வெல்வதென்றால் இரண்டு விசயம் நடக்க வேண்டும். ஒன்று புதிதாக 25,000 போராளிகளை திரட்டி என்னிடம் தாருங்கள். நான் இந்த யுத்தத்தை வென்று காட்டுகிறேன். அல்லது, கிளிநொச்சியை இராணுவம் கைப்பற்றாமல் ஏழு மாதங்கள் தடுத்து வைத்திருக்க வேண்டும்’.
அதென்ன ஏழு மாத கணக்கு? கிளிநொச்சி?
இதில்தான் விசயமே இருக்கிறது. என்னதான் அமெரிக்கா இந்த விசயத்தில் தலையிட்டாலும், இந்தியாவின் விருப்பமின்றி எதுவும் நடக்காதென்பது புலிகளிற்கும் தெரியும். ஏப்ரல் தேர்தலில் பாஜக வென்றாலும், பதவியேற்று எல்லாம் பங்சன் பண்ண தொடங்க, மே மாதமாகும்.
கிளிநொச்சிதான் புலிகளின் தலைநகரம் என்ற அபிப்பிராயம் உள்ளது. மே மாதம் வரை இராணுவத்தால் கிளிநொச்சியை பிடிக்க முடியவில்லையென்றால், ‘உங்களால் இனி முடியாதப்பா. அங்கே மக்கள் இறந்துகொண்டிருக்கிறார்கள்’ என இராஜதந்திர அழுத்தம் கொடுக்கலாம். மாறாக, கிளிநொச்சியை இராணுவம் கைப்பற்றினால், பாஜக அழுத்தம் கொடுத்தாலும், ‘இதோ பாருங்கள் மிஸ்டர் இந்தியா, புலிகளின் தலைநகரத்தையே நாம் கைப்பற்றி விட்டோம். இன்னும் நான்கு மாதம் பொறுங்கள். கடைசி புலியையும் வேட்டையாடி விடுகிறோம்’ என இலங்கை முரண்டுபிடிக்கலாம்.
 
இந்த இழுபறி காலமாக புலிகள் கணித்தது ஒரு மாதம். ஆக மொத்தம் 2009 யூன் மாதம் வரை ஒரு கணக்கை போட்டு வைத்திருந்தார்கள் புலிகள்.
ஒரு இடைத்தரகர் மூலமாக செப்ரெம்பர் மாதமே காங்கிரசின் ப.சிதம்பரத்திற்கு புலிகளின் சமரச நிலைப்பாடு அறிவிக்கப்பட்டதென்று சொன்னேன் அல்லவா, அது யாரால் அறிவிக்கப்பட்டது? புலிகள் அனுப்பிய தகவல் என்ன? அதற்கு பதிலாக சிதம்பரம் அனுப்பிய புரபோஷல் என்ன? இடைத்தரகராக இருந்தது யார் போன்ற விசயங்களை  குறிப்பிடுகிறேன்.
“பொட்டம்மானை மட்டும் ஒப்படையுங்கள்; யுத்தத்தை நிறுத்தலாம்“- இந்தியா கொடுத்த புரபோஷல் – 2
 
அன்ரன் பாலசிங்கத்துக்கு இந்தியா அனுப்பிய கடைசி செய்தி
பா.ஜ.கவுடன் மட்டும் தொடர்பேற்படுத்தி பலனில்லை, காங்கிரசுடனும் தொடர்பேற்படுத்த வேண்டுமென புலிகள் நினைத்தனர். பொது தேர்தலில் பா.ஜ.க சில சமயம் வெற்றியடையாவிட்டால், நிலைமை மோசமாகிவிடலாம். காங்கிரசுடன் தொடர்பிருப்பது அவசியம். அந்த பேச்சு சரி வந்தால், சில சமயங்களில் அவர்களே யுத்தத்தையும் நிறுத்தவும்கூடும்.
 
காங்கிரஸ் ஆட்சியில் இருந்தால் புலிகளிற்கு எதிராக நடப்பார்கள் என்பது புலிகளிற்கு தெரியும். அதனால்தான் 1991இல் ராஜிவ் காந்தியையும் கொன்றார்கள்.
2008 செப்ரெம்பரில் புலிகளின் செய்தியொன்று ப.சிதம்பரத்திற்கு கிடைத்தது. அந்த செய்தியை கொண்டு வந்தவர் மலேசிய வர்த்தக புள்ளி. சிதம்பரத்தின் மகன் கார்த்தி சிதம்பரத்துடன்  வர்த்தக தொடர்பில் இருப்பவர். இந்த வர்த்தகத்தில் சில சிக்கல்கள் ஏற்பட்டு பின்னர் நீதிமன்றத்திற்கு சென்றது உபரி தகவல். இதற்கு மேல், மலேசிய வர்த்தக புள்ளியை அடையாளப்படுத்த முடியாது. அது சட்டசிக்கல்களை ஏற்படுத்தும்.
புலிகளின் மெசேஜை அந்த வர்த்தக புள்ளிதான் ப.சிதம்பரத்திற்கு பாஸ் செய்தார். யார் மூலம் தகவலை பாஸ் செய்தால் காரியம் சாதிக்கலாமென்பதை புலிகள் அறிந்து வைத்திருந்தனர். “யுத்தத்தை நிறுத்த வேண்டும். பேச்சுக்காக புலிகள் விட்டுக் கொடுப்பிற்கும் தயாராக இருக்கிறார்கள். மக்கள் கொல்லப்பட்டு கொண்டிருக்கிறார்கள். அதற்காக போதியளவு இறங்கி வரவும் தயாராக இருக்கிறார்கள்“ என்பதே அந்த மெசேஜ்.
இந்த இடத்தில் மிகமுக்கிய இன்னொரு சம்பவத்தையும் சொல்ல வேண்டும். இதுவும் ஒரு பிளாஷ்பேக்தான். சிதம்பரத்தின் மூலம்தான் புலிகள் காங்கிரசுடன் தொடர்பை ஏற்படுத்துகிறார்கள் என நினைக்காதீர்கள். சிதம்பரத்துடனான தொடர்பு ஏற்படுத்தப்படுவதற்கு இரண்டு வருடங்களின் முன் “வெட்டு ஒன்று துண்டு இரண்டாக“ புலிகள்- காங்கிரஸ் பேச்சு நடந்து முடிந்திருந்தது. 2004ஆம் ஆண்டு காங்கிரஸ் ஆட்சியை பிடித்ததும் அந்த பேச்சு நடந்தது.
 
புலிகள்தான் இந்த பேச்சையும் ஆரம்பித்தார்கள். இந்தியாவின் நலன்களிற்கு குறுக்காக புலிகள் நிற்கமாட்டார்கள், உத்தியோகபற்றற்ற முறையிலான தொடர்பையாவது இரண்டு தரப்பும் பேணலாம், இதன் மூலம் தேவையற்ற குழப்பங்கங்களை தீர்க்கலாமென புலிகள் இந்தியாவிற்கு தகவல் அனுப்பினார்கள். இது 2005 இல் நடந்தது.
 
இந்த தகவல் பரிமாற்றத்தில் ஈடுபட்டவர்கள் இருவர். முதலாவது ஆள், நோர்வேயின் சமாதான தூதுவர் எரிக் சொல்ஹெய்ம். இரண்டாவது ஆள், பிரித்தானியாவிலுள்ள இந்திய தூதரகத்தில் பணியாற்றும் வடஇந்தியர். அவர் றோ அமைப்பை சேர்ந்தவர். புலிகளின் அரசியல் ஆலோசகர் அன்ரன் பாலசிங்கம் இலண்டனில் தங்கியிருந்தபோது, இந்தியாவுடன் நடந்த உத்தியோகபற்றற்ற பேச்சுக்கள் எல்லாம் இந்த றோ ஆள் மூலம்தான் பாலசிங்கத்துடன் நடத்தப்பட்டது.
உங்களிற்கு நன்றாக நினைவிலுள்ள ஒரு சம்பவத்தை உதாரணமாக சொல்லலாம். 2000 ஆம் ஆண்டு யாழ்ப்பாண குடாநாட்டை புலிகள் கைப்பற்றலாமென்ற நிலைமையிருந்தது. இப்போது இந்தியா தலையிட்டதாக சொல்கிறார்கள் அல்லவா, எப்படி தலையிட்டது தெரியுமா? இந்த றோ ஆள்தான் பாலசிங்கத்திற்கு இந்தியாவின் நிலைப்பாட்டை அறிவித்தார்.
2005 இல் நோர்வே தூதர் எரிக் சொல்ஹெய்ம் புலிகளின் செய்தியை இந்தியாவிற்கு சொன்னார். சொல்ஹெய்ம் ஒரு இராஜதந்திரி. “ம்ஸ பார்க்கலாம்“ என்ற அளவில் அவருடன் இந்தியா அளவாகத்தான் பேசியது.  ஆனால் இலண்டனில் உள்ள றோ ஆள்தான் இந்தியாவின் நிலைப்பாட்டை தெளிவாக சொன்னார். அந்த யோசனையை கேட்டு புலிகள் உண்மையிலேயே ஆடிவிட்டார்கள்.
 
2006 இன் மத்திய பகுதி. அன்ரன் பாலசிங்கம் கடுமையான நோய்வாய்ப்பட்டிருந்த சமயம். சமாதான பேச்சுக்கள் முறிந்து, வன்னியில் படைநடவடிக்கைகள் தீவிரம் பெற தொடங்கியிருந்தது.  தனது இறுதிக்காலம் நெருங்கிவிட்டதை பாலசிங்கம் உணர்ந்திருந்தார். இந்த சமயத்தில் பிரபாகரன்- பாலசிங்கம் உறவிலும் முன்னரை போல சுமுகமிருக்கவில்லை. இந்தியாவை சமாளித்தால்தான் விடுதலைப்புலிகளிற்கு எதிர்காலம் பிரகாசமாகுமென்பதை பாலசிங்கம் உணர்ந்திருந்தார்.  தனது மரணத்திற்கு முன்னர் இந்தியாவை சமாளிக்க விரும்பினார். கடுமையான நோய்வாய்ப்பட்டிருந்த சமயத்திலும் இந்திய மத்திய அரசிற்கு சில தகவல்களை கொடுத்தார். புலிகள் ஒருபோதும் இந்தியாவின் நலன்களிற்கு எதிராக செயற்படாது, இந்தியா தனது நிலைப்பாட்டை மாற்றிக்கொண்டு  புலிகளை அங்கீகரிக்க வேண்டுமென கேட்டிருந்தார்.
 எரிக் சொல்ஹெய்ம்
இந்த தகவல்கள் எல்லாம் இலண்டனில் இருந்த றோ ஆளின் மூலம் காங்கிரசின் உயர்மட்டத்திற்கும், சௌத் புளொக் கொள்கை வகுப்பாளர்களிற்கும் சென்றது. அவர்கள் சில வாரம் இந்த விடயத்தில் தீவிர ஆலோசனை நடத்திவிட்டு புலிகளிற்கு பதில் அனுப்பினார்கள். இலண்டன் ஆள் மூலம்தான் அந்த பதில் வந்தது.
“ராஜிவ் கொலை விசயத்தில் பிரபாகரன், பொட்டம்மான் இருவருமே குற்றவாளிகள். இருவரையும் தண்டிக்க வேண்டுமென்பதுதான் இந்தியாவின் நிலைப்பாடு. கடந்தகால சம்பவங்களிற்காக புலிகளும் வருந்துகிறார்கள். சில விசயங்களில் விட்டுக்கொடுப்பாகவும் நடக்க தயாராக இருக்கிறார்கள். இந்தியாவும் இதை புரிந்துகொண்டு சில விட்டுக்கொடுப்புக்களிற்கு தயாராக இருக்கிறது. பிரபாகரன் உங்கள் தலைவர். அவரை தண்டிக்கப்போகிறோம் என்பது பொருத்தமில்லாததுதான். இதில் இந்தியா விட்டுக்கொடுப்பாக நடக்கிறது. ஆனால் கண்டிப்பாக பொட்டம்மானை இந்தியாவிடம் ஒப்படைக்க வேண்டும். அவர் இந்திய சட்டங்களின்படி தண்டிக்கப்படுவார்“
இதுதான் இலண்டனில் இருந்த றோ ஆள், பாலசிங்கத்திற்கு கொடுத்த இந்தியாவின் செய்தி.
இந்த செய்தி பிரபாகரனிற்கு உடனே அறிவிக்கப்பட்டது. இதற்கு மேல் இந்த விடயத்தில் எதையும் பேச பிரபாகரன் தயாராக இருக்கவில்லை. இதனால் 2006 இறுதிக்காலத்துடனேயே இந்த பேச்சு இல்லாமல் போய்விட்டது. இதுதான் காங்கிரஸ் ஆட்சிக்கு வந்தபின்னர் புலிகள் மேற்கொண்ட முதலாவது தொடர்பு முயற்சி.
இதற்கு இரண்டு வருடங்களின் பின்னரே மீண்டும் காங்கிசுடன் புலிகள் தொடர்பை ஏற்படுத்தினார்கள். ப.சிதம்பரம் தமிழராக இருந்ததும், மத்திய அரசில் செல்வாக்கானவராக இருந்ததும் புலிகள் அவரை தொடர்புகொள்ள காரணமாக அமைந்தது.
 
இந்த சமயத்தில் புலிகள் இன்னொரு வழியிலும் இந்தியாவை நெருங்கினார்கள். திமுக அப்போது காங்கிரஸ் கூட்டணியில் இருந்தது. திமுக தலைவர் கருணாநிதியின் புதல்வி கனிமொழி ஒரு கவிஞர். வழக்கமான அரசியல்வாதிகளுடன் ஒப்பிடுகையில் முற்போக்கான சிந்தனையுடையவர். அமெரிக்காவில் உள்ள தமிழ்நாட்டு பேராசிரியர் ஒருவர் மூலம் புலிகளின் அரசியல்துறை பொறுப்பாளர் நடேசனிற்கும், கனிமொழிக்குமிடையில் தொடர்பு ஏற்பட்டது. ஏற்கனவே சிதம்பரத்திற்கு அனுப்பிய அதே செய்தியை கனிமொழிக்கும் புலிகள் அனுப்பினார்கள். சிதம்பரத்திற்கு அனுப்பிய விவரத்தையும் சொல்லி, சிதம்பரத்தை இந்த விடயத்தில் அக்கறையெடுக்க வலியுறுத்துமாறும் நடேசன் கேட்டுக் கொண்டார்.
செப்ரெம்பரில் சிதம்பரத்திற்கு புலிகள் ஒரு மெசேஜ் அனுப்பினாலும், அது சரணடைவிற்கான சமரசமல்ல. இந்தியாவின் நாடி பிடித்து பார்த்து, புலிகளின் தரப்பில் விட்டுக்கொடுப்பிற்கு தயார் என்ற செய்தியை மத்திய அரசிற்கு முன்னரே தெரியப்படுத்தலாம் என்பதே நோக்கம்.
2009 ஜனவரியில் அமெரிக்கா, ஏப்ரலில் இந்தியா தேர்தல்களை புலிகள் எதிர்பார்த்தார்கள் என்பதையும் ஏற்கனவே குறிப்பிட்டிருந்தேன். அமெரிக்காவை இலங்கை விவகாரத்தில் தலையிட வைக்கும் பொறுப்பை குமரன் பத்மநாதன் ஏற்றிருந்தார். அவரிடம் 2008 இல் மீண்டும் சர்வதேச பொறுப்பாளர் பதவி வழங்கப்பட்டுவிட்டது. மலேசியாவில் இருந்தபடி கே.பி விடயங்களை கையாண்டார். எனினும், அமெரிக்க தலையீட்டு முயற்சிகள் வெற்றியளிக்கவில்லை. தேர்தலில் வென்றாலும், ஈழ விவகாரத்தில் ஒரு அளவிற்கு மேல் நம்மால் செயற்பட முடியாதென பராக் ஒபாமா தரப்பிலிருந்து கூறப்பட்டிருந்தது.
இராணுவத்தை முன்னகர விடாமல் தடுத்து வைப்பதும் புலிகளிற்கு முடியாத காரியமாக இருந்தது. இந்தியாவிற்கு புலிகள் மெசேஜ் அனுப்பிய பின்னர், 2008 ஒக்ரோபரில் மணியங்குளம், வன்னேரிக்குளம், ஜெயபுரம், நாச்சிக்குடா, கிராஞ்சி, ஜெயபுரம், பூநகரி, வலைப்பாடு என வரிசையாக நகரங்கள் இராணுவத்திடம் விழுந்து கொண்டிருந்தது.
பிரபாகரன் போட்ட ஏழு மாத கணக்கை பற்றி கடந்த பாகத்தில் குறிப்பிட்டிருந்தோம். இந்தியாவிற்கு அனுப்பிய தூது, இந்திய, அமெரிக்க தேர்தல்கள் அனைத்தையும் மனதில் வைத்து, இராணுவத்தின் முன்னகர்வை தடுக்க புலிகள் ஜெயபுரத்தில் பெரும் மண் அணையொன்றை அமைத்திருந்தார்கள். அந்த மண் அணை அமைக்கப்பட்ட விதம், அதை இராணுவம் எப்படி தகர்த்தது என்பது பற்றிய விபரங்களை விலாவாரியாக பின்னர் குறிப்பிடுவோம்.
புலிகள் ஜெயபுரத்தில் இருந்து நாச்சிக்குடா வரை பன்னிரண்டு அடி உயர மண் அணை அமைத்திருந்தனர். இதன் முன்பக்கத்தில் பாரிய குழி. இராணுவம் கவச வாகனத்தில் வர முடியாது. முன்னேறி வரும் இராணுவமும் அந்த குழியை கடந்துதான் மண் அணையில் ஏற முடியும். இதற்குள் மண் அணையின் உச்சத்தில் பாதுகாப்பாக அமைக்கப்பட்டுள்ள பதுங்குகுழியில் இருக்கும் புலிகள், இராணுவத்தை சுட்டுவிட முடியும். இந்த மண் அணையில் புலிகளின் அணிகள் நிலைகொண்டிருந்தபோது தளபதி பானு அந்த பகுதிக்கு பொறுப்பாக இருந்தார். இந்த மண் அணையை இராணுவம் கைப்பற்றியது புலிகளின் சரியான திட்டமிடலின்மை காரணமாகவே. மண் அணையை புலிகள் முழுமையாக அமைக்கவில்லை. ஜெயபுரத்திற்கும் பல்லவராயன்கட்டிற்கும் இடைப்பட்ட வெட்டவெளி பகுதியில் 400 மீற்றர் நீளமான பகுதியில் மண் அணை அமைக்கப்படவில்லை. அதுபோல கிராஞ்சிக்கு அண்மையிலிருந்த நீர்ப்பரப்பு ஒன்றிற்கு எதிரிலும் மண் அணை அமைக்கப்படவில்லை. இரண்டு பகுதியிக்குள்ளாளும் இராணுவம் முன்னேறாது என பானு கணக்கிட்டிருந்தார். இரண்டரை மாதம் இந்த மண் அணையை தகர்க்க முடியாமல் இராணுவம் திண்டாடி, இறுதியில் இரவோடு இரவாக இராணுவ அணியொன்று வெட்டவெளியை கடந்து, புலிகள் மண் அணை அமைக்காத பகுதிக்குள்ளால் நுழைந்து, புலிகளின் பெரும் மண் அணையை உடைத்துக்கொண்டு உள்நுழைந்தனர்.
 
சிதம்பரம் மூலம் இந்தியாவுடன் பேச்சு நடத்தும் சமயத்தில் இராணுவத்தால் தொடர்ந்து முன்னேற முடியாதென்ற நிலைமையை ஏற்படுத்த வேண்டுமென புலிகள் திட்டமிட்டதும் நடக்கவில்லை.
 புலிகளின் சிறிய மண் அணையொன்றை உடைக்க முயன்ற இராணுவ சிப்பாய்களின் கதி
குறைந்த பட்சம் அமெரிக்க தேர்தல்வரையாவது இராணுவத்தை கிளிநொச்சிக்கு அண்மையாகவும் வராமல் தடுக்க வேண்டுமென புலிகள் நினைத்தார்கள். அதுவும் நடக்கவில்லை.
புலிகளின் சர்வதேச பொறுப்பாளராக குமரன் பத்மநாதன் அப்பொழுது தாய்லாந்து, மலேசியாவில் இருந்து செயற்பட்டார். அமெரிக்க தரப்புடன், கே.பியின் ஆட்கள்தான் பேசினார்கள். பராக் ஒபாமாவின் முதன்மைசெயலாளர் மட்டத்தில் இந்த பேச்சுக்கள் நடந்தன. இந்திய தேர்தலில் பா.ஜ.க வெல்லுமென நிலவிய கணிப்பைத்தான் ஒபாமாவின் வட்டாரங்களும் நம்பினார்கள். பா.ஜ.க ஆட்சிக்கு வந்ததும், 2009 மே, யூன் மாதங்களில் இலங்கைக்கு அழுத்தம் கொடுத்து, யுத்தத்தை நிறுத்தலாம், அதுவரை எதுவும் சாத்தியமாகும் வாய்ப்பில்லையென்பதை அமெரிக்க தெளிவாக சொல்லிவிட்டது.
இந்த இழுபறிகள் நடந்து கொண்டிருக்க, 2009 ஜனவரியில் இராணுவம் பரந்தன், கிளிநொச்சி நகர்களை கைப்பற்றியது. இந்தியா, அமெரிக்காவை தலையிட வைக்க எந்த இடங்களை இழக்ககூடாதென நினைத்தார்களோ, அந்த இடங்களை இராணுவம் கைப்பற்றிவிட்டது.
நிலைமை கைமீறி போகிறதென நினைத்த நடேசன், பிரபாகரனுடன் ஆலோசிக்காமல் இந்தியாவுடன் ஒரு சமரச முயற்சியில் இறங்கினார். புலிகளின் முக்கியஸ்தர் பாலகுமாரன், சமாதானசெயலக பொறுப்பாளர் புலித்தேவன், கடற்புலிகளின் தளபதி சூசை, நீதித்துறை பொறுப்பாளர் பரா, நிதித்துறை பொறுப்பாளர் தமிழேந்தி உள்ளிட்டவர்களுடன் ஆலோசித்துவிட்டே முயற்சியை ஆரம்பித்தார். மலேசியாவிலிருந்த கே.பிக்கும் விசயத்தை சொன்னார்கள். நடேசன் வன்னியிலிருந்து ஒரு முனையில் சமரச முயற்சியை நகர்த்த, கே.பி இன்னொரு தரப்பினூடாக சமரச முயற்சியில் ஈடுபடுவதாக முடிவானது.
நடேசன் உடனடியாகவே காரியத்தில் இறங்கினார். காங்கிரசை அணுக நடேசன் தேர்வுசெய்தது ஒரு பெண்ணை!
அவர் யார்? நடேசனின் முயற்சிக்கு இந்தியாவின் ரியாக்சன் எப்படியிருந்தது? பிரபாகரன் அதை அறிந்தாரா? கிளிநொச்சியில் குறிவைக்கப்பட்ட பிரபாகரன்; தகவல் வந்தது அமெரிக்காவில் இருந்து!-
 இந்தியா கொடுத்த புரபோஷல் 03
 
மலேசியா வழியாக புலிகளிற்கு அனுப்பப்பட்ட சற்றலைற் போனில் விசயமிருந்தது!
பீஷ்மர்
தி.மு.க தலைவர் கருணாநிதியின் மகள் கனிமொழிக்கும் விடுதலைப்புலிகளின் அரசியல் துறை பொறுப்பாளர் நடேசனிற்குமிடையில் பேச்சுவார்த்தைகள் நடந்ததாக ஒரு செய்தி வெளியாகியிருந்ததை அறிந்திருப்பீர்கள். அமெரிக்காவில் உள்ள பேராசிரியர் ஒருவர் மூலம் நடேசனிற்கும், கனிமொழிக்குமான தொடர்புகள் ஏற்பட்டதை கடந்த அத்தியாயங்களில் குறிப்பிட்டிருந்தோம்.
யுத்தம் முடிந்த பின்னர்தான் இந்த பேச்சு விபரங்கள் வெளியில் கசிந்தன. இரு தரப்பிலிருந்தும் பரிமாறப்பட்ட கடிதங்கள் சிலவும் வெளியாகின. இந்த கடிதங்கள் லீக் ஆனதில் அதிகம் அப்செற் ஆனவர் கனிமொழி. புலிகள் விடயத்தில் தி.மு.க வேடம்போட்டது என்ற அப்பிராயம் சாதாரண மக்களிடம் ஏற்பட்டதில் இந்த கடித பரிமாற்ற விசயம் லீக் ஆனதும் முக்கிய பங்குவகித்தது. இந்த தொடர்பில் சம்பந்தப்பட்ட இருவர் நடேசன், கனிமொழி. இறுதிப்போரில் நடேசன் மரணமாகி விட்டார். விசயம் வெளியாவதென்றால், தன்னைத்தவிர வேறு வழியில்லையென கனிமொழி நினைத்திருந்தார். அவர் வாயே திறக்காமலிருந்த, நடேசனுடனான கடித பரிமாற்றங்கள் லீக் ஆனது அவரை அதிர்ச்சியடைய வைத்தது. எப்படி அந்த விசயங்கள் லீக் ஆனதென்பதை கடைசியில் சொல்கிறோம்.
 
2009 ஜனவரியில் பரந்தன் நகரத்தை இராணுவத்தின் 58வது டிவிசன் கைப்பற்றியது. அடுத்தடுத்த நாட்களில் கிளிநொச்சி நகரும் இராணுவத்திடம் விழுந்தது. கிளிநொச்சி நகரை மையமாக வைத்து புலிகள் ஒரு இராஜதந்திர விளையாட்டை செய்ய விரும்பியிருந்தார்கள். கிளிநொச்சியை இராணுவத்தால் பிடிக்க முடியாது, யுத்தம் தொடர்வது வீணாண உயிரிழப்பைத்தான் ஏற்படுத்தும் என்பதை சொல்லாமல் சொல்லும் இராஜதந்திர விளையாட்டை செய்தார்கள். இதற்காக கிளிநொச்சியை சுற்றி பெரும் மண்அணைகளை அமைத்து, இராணுவம் உள்நுழைய முடியாதபடி பாதுகாப்பு ஏற்பாடுகளை செய்திருந்தார்கள். கிளிநொச்சியை கைப்பற்றுவது உண்மையிலேயே இராணுவத்திற்கு தலையிடியாகத்தான் இருந்தது.
கிளிநொச்சியை சுற்றியுள்ள மண் அணைகளை உடைக்க முடியாதென்பதை தெரிந்ததும், கரடிப்போக்கில் ஏ9 பிரதானவீதியை சந்தடியில்லாத நகர்வு மூலம் இராணுவம் கைப்பற்றி, பரந்தனையும் கிளிநொச்சியையும் வீழ்த்தினர்.
 கனிமொழி
நிலைமை கட்டுமீறி போவதை உணர்ந்த நடேசன் ஒரு இரகசிய பேச்சு முயற்சியை ஆரம்பித்தார். நடேசன் இப்படியொரு முயற்சியை ஆரம்பிப்பதற்கு காரணமாக இருந்தவர் கே.பி. அமெரிக்க இராஜாங்க திணைக்களத்தை சேர்ந்தவர்களுடனும் கே.பி அப்போது பேசிக்கொண்டிருந்தார். இதை பிரபாகரனிற்கும் தெரியப்படுத்தியிருந்தார். ஆனால் சரணடைவு மூலமே சமாதானத்தை ஏற்படுத்தலாம் என்பது போன்ற பேச்சுக்கள் எதுவும் அப்பொழுது நடக்கவில்லை.
ஆனால், 2009 ஜனவரியிலேயே புலிகளை சரணடைய வைத்தாவது யுத்தத்தை நிறுத்தும் முயற்சியை கே.பி ஆரம்பித்து விட்டார்!
 
2009 ஜனவரியில் அமெரிக்க இராஜாங்க திணைக்கள அதிகாரிகளிற்கு கே.பி ஒரு புரபோஷலை அனுப்பியிருந்தார். அமெரிக்கா கப்பல் புலிகளை ஏற்ற வருகிறதென பின்னாளில ஒரு கதை உலாவியதே, இந்த புரபோஷல்தான் அந்த கதையை உருவாக்கியது!
அமெரிக்க புரபோஷல் பற்றிய விபரங்களை பின்னர் குறிப்பிடுகிறேன். அமெரிக்காவுடன் ஒரு பக்கமாக பேச்சை ஆரம்பித்ததை போல, இந்தியாவுடனும் பேச்சை ஆரம்பிக்க வேண்டுமென வன்னியிலிருந்த நடேசனை தொடர்பு கொண்டு கே.பி சொன்னார். கிளிநொச்சியின் வீழ்ச்சியுடன், யுத்தத்தை இனி வெல்ல முடியாதென்ற அபிப்பிராயம் நடேசனிற்கு வந்துவிட்டது. எப்படியாவது ஒரு சமரச முயற்சியை செய்ய வேண்டுமென நடேசன் யோசித்துக் கொண்டிருந்த சமயத்தில்தான், கே.பி பேசினார்.
இந்திய மத்திய அமைச்சர் சிதம்பரத்திற்கு, மலேசிய வர்த்தக புள்ளியொருவர் மூலம் புலிகள் 2008 செப்ரெம்பரில் ஒரு தகவல் அனுப்பினார்கள் என்பதை கடந்த அத்தியாயங்களில் குறிப்பிட்டிருந்தோம். ஒரு மாதத்தில் புலிகளுடனான சகல தொடர்பையும் அந்த வர்த்தகபுள்ளி துண்டித்து விட்டார். தனிப்பட்ட தொலைபேசி இலக்கத்தையும் மாற்றிவிட்டு, அலுவலகத்தை தொடர்புகொண்டாலும் “Boss இல்லை“ என்பதை போன்ற பதிலை சொல்ல வைத்தார். அதற்கு காரணம்- மலேசிய உளவுத்துறை!
 
புலிகளின் செய்தியொன்றை அந்த மலேசிய பிரபலம் சிதம்பரத்திற்கு பாஸ் பண்ணிய விவகாரம் மலேசிய உளவுத்துறைக்கு ஒரு வாரத்திற்குள் கிடைத்துவிட்டது. மலேசிய உளவுத்துறை புலிகளின் இந்திய தொடர்பை ட்ரக் பண்ணிக்கொண்டும் இருக்கவில்லை. அவர்களிற்கு இது முக்கியமில்லாத விசயம். ஆனால், நாட்டிற்கு அத்தியாவசியமான விசயத்தைபோல எப்படி இதை ட்ரக் பண்ணி பிடித்தார்கள்?
2009 மே வரை புலிகளும் இந்த விசயத்தில் தலையை பிய்த்துக் கொண்டிருந்தார்கள். ஆனால் விடை கிடைக்கவில்லை. இன்று வரை மர்மமாக உள்ள விசயங்களில் அதுவும் ஒன்று.
புலிகளிற்கும் இந்தியாவிற்குமிடையில் தூதராக செயற்பட்ட வர்த்தகரை மலேசிய உளவுத்துறை ஏன் தடுத்தது? அவர் தூதராக செயற்படுகிறார் என்ற விசயத்தை மலேசிய உளவுத்துறைக்கு தெரிவித்தது யார்?
புலிகள் இயக்கம் அழியும்வரை இதற்கான விடையை தேடினார்கள். கடைசி நேர நெருக்கடியில் இதற்கு சரியான பதிலை கண்டுபிடிக்க முடியாமல் போய்விட்டது. ஆனால் அப்பொழுது புலிகளிற்கு ஒருவர் மீது உறுதிப்படுத்தப்படாத சந்தேகம் இருந்தது.
அவர் கே.பி!
மலேசிய வர்த்தக புள்ளியின் மூலம் புலிகளும் இந்தியாவும் நெருங்கி வரலாம் என்ற சூழ்நிலை இருந்தது. இந்த சமரச முயற்சியை உடனடியாக நிறுத்தாவிட்டால், புலிகள் அனுகூலமடைய வாய்ப்புண்டு. இதையெல்லாம் தெரிந்த ஒருவர்தான், புகுந்து விளையாடியிருக்க வாய்ப்புண்டு. உள்ளேயிருந்த யாரோதான் டபிள்கேம் ஆடியிருக்கிறார்கள் என்பது புலிகளிற்கு தெரிந்தது. அவர் யார்?
2008 ஒக்ரோபரில் இருந்தே கே.பி மீது புலிகளிற்கு ஒரு சந்தேகம் இருந்து கொண்டிருந்தது. புலிகளின் வெளிநாட்டு உளவுப்பிரிவு நெட்வேர்க்கிலிருந்து கே.பி சம்பந்தமான சில இரகசிய தகவல்கள் பொட்டம்மான் மூலமாக பிரபாகரனின் காதிற்கு போயிருக்கிறது. வெளிநாட்டு உளவுப்பிரிவுகளின் மூலம் இலங்கை உளவுப்பிரிவிற்கு கே.பியுடன் தொடர்பு ஏற்பட்டு விட்டது, அவர்களது திட்டப்படியே அவர் இயங்குகிறார் என்பதே அவர்கள் அனுப்பிய தகவல்.
 கே.பி
என்றாலும், பிரபாகரன் இதை அவ்வளவாக நம்பவில்லை. இன்னும் முழுமையாக உறுதிப்படுத்தும்படிதான் பதில் சொன்னார். அப்போதைய நெருக்கடியான சமயத்தில் இப்படியான பஞ்சாயத்தொன்றை அவர் விரும்பிபாலிருந்திருக்கலாம். கே.பியின் உயர்மட்ட பொறுப்பாளர்கள் யாராவது வெளிநாட்டு உளவுப்பிரிவுகளுடன் தொடர்பை வைத்திருந்திருக்கவும் வாய்ப்புள்ளது, ஏற்கனவே ஒருமுறை கே.பி மீது வீணாண சந்தேகம் கொண்டு அவரை ஒதுக்கியது பிரபாகரனின் மனதில் இருந்ததால், இம்முறை வந்த குற்றச்சாட்டை அவ்வளவாக கண்டுகொள்ளவில்லை.
என்றாலும், சில எச்சரிக்கையான நடவடிக்கைகள் எடுத்திருந்தார். கே.பியுடன் அல்லது அவரது நெற்வேர்க்கில் உள்ள யாருடனும் 2009 ஜனவரியின் பின்னர் செய்மதி தொலைபேசியில் பிரபாகரன் பேசியதில்லை.
 
அவசியமான தகவல் என்பதால் இடையில் இன்னொரு கொசுறு தகவலையும் சொல்லிவிடுகிறேன். இதுவும் புலிகளின் செய்மதி தொலைபேசிகள் பற்றிய செய்திதான்.
புலிகள் இயக்கத்திற்காக முதன்முதலில் செய்மதி தொலைபேசிகள் வாங்கப்பட்டது மலேசியாவில். அது மலேசிய உரிமையாளரின் நிறுவனமல்ல. அமெரிக்க செய்மதி தொலைபேசி நிறுவனத்தின் சப் டீலர் நிலையமே மலேசியாவில் இயங்கியது. ஒரே தடவையில் அதிக தொலைபேசிகளை வாங்குவது யாரையும் சந்தேகம் கொள்ள வைக்கும்



Share this:

NEAR REJSE. DK

ayngaran.dk

.

DENMARK

Kommende Film danmark

DANMARK TAMIL FILM

SWEES TRAVELS

Tamilnews.cc-facebook

திருமண அழைப்பிதழ்

Travel News

Tamil Movies

Honeymoon Package

Denmark Kommende Film

HOLY LAND /2018/2019

HolylandTour Package 2018 cont/ 0091 9884849794

Umrah 2018-2019

INDIAN MANGOES ( exports)

கிரனைட் கற்கள் மலிவு விற்பனை..Dk

Denmark வீட்டு கொண்டாட்டங்களுக்கு 25695728

கேர்னிங் எம்.பி. கடை Dk

08.10.2014 புதன் திறப்புவிழா

NAER CAR RENTAL SERVICES

swees travels

தொலைபேசி எண்: 22666542 dk

Andaman Package

Aalbo Attractio Asian SuMart dk

side

jothidam

11,600 -D4 3 N Goa Package

North India Rs. 17,000 -09N

puthandu palan

09N 10 D Best of Kerala

Wedding Holl in india

Kashmir Tour 09N in- 3* Hotel

RANDERS DK 0045 40737632

Maldives Special

SHIRDI SAI BABA DARSHAN

திருமண நல் வாழ்த்துக்கள்

Wildlife of Gujarat

Temple Tours

Srilanka Tour Package 21.500Rs

Forex 9884849794

இணையத்தளங்கள் இணைப்புக்கள்

Free ads

marana arvithal

© tamilnews.cc. All right reserved Design and development by: Gatedon Technologies