அரசக்குடும்பத்தில் இருந்து வேறு வழியின்றி விலகியதாக ஹாரி உருக்கம்!
21 Jan,2020
இங்கிலந்து அரசக்குடும்பத்தில் இருந்து வேறு வழியின்றி விலகியதாக ஹாரி உருக்கத்துடன் தெரிவித்துள்ளார்.
லண்டனில் நடந்த விருந்து ஒன்றில் பங்கேற்று பேசிய ஹாரி, அரசக்குடும்பத்தில் இருந்து விலகியது தொடர்பாக முதன்முறையாக விளக்கம் அளித்துள்ளார்.
தானும் தனது மனைவி மேகனும் மிகுந்த வருத்தத்துடன் அரசக்குடும்பத்தில் இருந்து வெளியேறியதாகவும் அதே சமயம், மனைவி மற்றும் மகன் ஆர்க்கியுடன் மிகவும் அமைதியான வாழ்க்கையை தேடுவதற்கு தனது அரச பதவியை கைவிடுவதைத் தவிர வேறு வழியில்லை என்றும் ஹாரி கூறினார்.
இங்கிலாந்து ராணி, அவரது இராணுவம் மற்றும் காமன்வெல்த்துக்கு தொடர்ந்து சேவை செய்வோம் என்று தானும் தனது மனைவி மேகனும் நம்புவதாக அவர் குறிப்பிட்டுள்ளார்.
இழிவுபடுத்திவிட்டதாக அவரது தந்தை குற்றச்சாட்டு!
இங்கிலாந்து அரசக் குடும்பத்தை மேகன் இழிவுப்படுத்திவிட்டதாக அவர் தந்தை தாமஸ் மார்க்ல் குற்றஞ்சாட்டியுள்ளார்.
ஜெர்மனியில் செய்தி நிறுவனம் ஒன்றுக்கு பேட்டியளித்த அவர், இளவரசியாக வேண்டும் என்பது ஒவ்வொரு பெண்ணின் கனவு என்றும் ஆனால் தனக்கு கிடைத்த அந்த வாய்ப்பை பணத்திற்காக மேகன் தூக்கி எறிந்துக் கொண்டிருப்பதாகவும் கூறினார்.
2018 ஆம் ஆண்டு ஹாரி திருமணம் செய்துகொண்டபோது அரசக்குடும்பத்தின் ஒரு அங்கமாக இருந்து செயல்படுவேன் என மேகன் உறுதி ஏற்றதாக குறிப்பிட்டுள்ள தாமஸ் மார்க்ல், நீண்ட கால வரலாற்று சிறப்பு கொண்ட இங்கிலாந்து அரசக்குடும்பத்தை ஹாரியும் மேகனும் அழித்துக் கொண்டிருப்பதாக குற்றஞ்சாட்டியுள்ளார்.