திருச்சி அருகே தாயை தாக்கிய தந்தையை மகனே அடித்துக்கொன்ற சம்பவம் அப்பகுதியில் பரபரப்பை ஏற்படுத்தியுள்ளது. இதுகுறித்து போலீசார் விசாரணை நடத்தி வருகின்றனர்.
திருச்சி மாவட்டம், திருவெறும்பூர் அருகே உள்ள வேங்கூர் மாரியம்மன் கோவில் தெருவை சேர்ந்தவர் குணசேகரன் (வயது 55). இவர் திருச்சி என்.ஐ.டி. கல்லூரியில் அலுவலக உதவியாளராக பணியாற்றி வந்தார். இவருக்கு ரத்தினம் என்ற மனைவியும், சுதர்சன், பிரியதர்சன் ஆகிய 2 மகன்களும், மதுமிதா என்ற ஒரு மகளும் உள்ளனர்.
இதில் சுதர்சன் (23) ஐ.டி.ஐ. 2-ம் ஆண்டும், மதுமிதா 10-ம் வகுப்பும் படித்து வருகின்றனர். 2 மகன்களும் சமயபுரம் அருகில் உள்ள மாடக்குடி கிராமத்தில் தாத்தா வீட்டில் தங்கியிருந்து படித்து வருகிறார்கள்.
குணசேகரனுக்கு குடிப்பழக்கம் இருந்தது. தினமும் குடித்து விட்டு, வீட்டு செலவுக்கு பணம் கொடுக்காததோடு மனைவி ரத்தினத்திடமும் அடிக்கடி தகராறில் ஈடுபட்டு வந்தார்.
இதற்கிடையே மகள் மதுமிதாவிற்கு பள்ளி கட்டணம் செலுத்துவதற்கு கூட பணம் இல்லாமல் ரத்தினம் சிரமப்பட்டு வந்தார். இதுபற்றி குணசேகரன் சற்றும் கவலைப்படாமல் தினமும் மது போதையில் வீட்டுக்கு வருவதை வாடிக்கையாக கொண்டிருந்தார். நேற்றும் அளவுக்கு அதிகமான போதையில் அவர் வந்தார்.
அப்போது மகள் மதுமிதாவுக்கு பள்ளி கட்டணம் செலுத்தாதது குறித்து குணசேகரனுக்கும் அவரது மனைவி ரத்தினத்திற்கும் தகராறு ஏற்பட்டது. அப்போது குணசேகரன் ரத்தினத்தை அடித்தார்.
இது குறித்து ரத்தினம் மாடக்குடியில் தாத்தா வீட்டில் இருந்த மகன்களுக்கு போன் செய்து தெரிவித்தார். உடனே சுதர்சனும், பிரியதர்சனும் வேங்கூருக்கு புறப்பட்டு வந்தனர்.
நள்ளிரவு 1 மணிக்கு தந்தை குணசேகரனிடம் சுதர்சன் தாயை ஏன் அடித்தீர்கள் என தட்டி கேட்டார். அப்போது தந்தைக்கும் மகனுக்கும் தகராறு ஏற்பட்டது. இதனால் ஆத்திரமடைந்த சுதர்சன், குணசேகரனை தந்தை என்றும் பாராமல் கட்டையால் தலையில் சரமாரியாக தாக்கினார்.
இதில் குணசேகரனுக்கு தலையில் பலத்த காயம் ஏற்பட்டது. ரத்த வெள்ளத்தில் மயங்கிய அவரை உறவினர்கள் காப்பாற்றி திருச்சியில் உள்ள மருத்துவனையில் சிகிச்சைக்கு சேர்த்தனர்.
அவருக்கு தீவிர சிகிச்சை அளிக்கப்பட்டு வந்த நிலையில் இன்று காலை குணசேகரன் சிகிச்சை பலனின்றி பரிதாபமாக இறந்தார்.
இது குறித்து குணசேகரனின் மற்றொரு மகன் திருவெறும்பூர் போலீசில் புகார் செய்தார். போலீசார் வழக்குப்பதிவு செய்து தந்தையை அடித்து கொன்ற மகன் சுதர்சனை தேடி வருகிறார்கள். அவர் தலைமறைவாகி விட்டதாக கூறப்படுகிறது. இந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.